Morgunblaðið | 10.3.2020 | 21:02 | Uppfært 22:38

„Þurfum að fara eins fljótt og hægt er“

Kap VE á loðnumiðum. Mynd úr safni.

„Við þurfum að fara eins fljótt og hægt er. Það er ekki eftir neinu að bíða,“ segir Birkir Bárðarson, fiskifræðingur og leiðangursstjóri hjá Hafrannsóknastofnun, en ákveðið hefur verið að senda loðnuskipið Kap VE til loðnuleitar og rannsókna. Verður leiðangurinn sá fjórði í vetur.

„Reynt verður að skoða framvindu hrygningargöngunnar og hrygningarinnar fyrir sunnan og vestan. Einnig erum við að spá í að skoða hvað er að gerast úti fyrir Norðurlandi,“ segir Birkir.

Gunnþór Ingvason, framkvæmdastjóri Síldarvinnslunnar, sagði í Morgunblaðinu í gær að víða hafi frést af loðnu, m.a. á Strandagrunni og í Þistilfirði.