Fjögur leikskólabörn smituð

Fjögur leikskólabörn og 33 grunnskólanemendur hafa greinst með kórónuveiru í Reykjavík. Þá hafa einnig 28 starfsmenn leikskóla og 18 starfsmenn grunnskóla smitast af veirunni, en smit hafa nú komið upp í 11 leikskólum og 20 grunnskólum Reykjavíkurborgar. Kemur þetta fram í svari skóla- og frístundasviðs við fyrirspurn Morgunblaðsins, en tölurnar miðast við 2. apríl.

Í Reykjavík eru nú 355 grunnskólanemendur í sóttkví og 3.351 í leyfi frá skóla að ósk foreldra. Fjöldi barna á leikskólaaldri í sóttkví er 166 og eru 1.448 leikskólabörn í leyfi að ósk foreldra. Alls er því 5.320 leik- og grunnskólabörnum í Reykjavík haldið heima þessa dagana.

Skúli Helgason, borgarfulltrúi Samfylkingar og formaður skóla- og frístundaráðs, segir ljóst að ákveðinn hópur foreldra vilji hafa vaðið fyrir neðan sig og vísar hann þar til mikils fjölda barna í leyfi frá skóla.

„Ástæðurnar geta verið mýmargar; persónulegar eða tengdar heilsufari barnanna eða einhverra á heimilinu. Við höfum fullan skilning á því,“ segir hann og bætir við að Reykjavíkurborg hafi lagt mikið kapp á að koma í veg fyrir smit inni í skólum. Segir Skúli það hafa heppnast vel til þessa og bendir í því samhengi á að leikskólabörn séu 6.237 talsins og grunnskólabörn 15.322. „Hlutfallslega eru þetta því mjög lágar tölur,“ segir hann.

Aðspurður segir Skúli mikinn baráttuhug vera í starfsfólki skólanna. „Ég er mjög stoltur af þessu fólki. Hópurinn er afar lausnamiðaður í þessum sérstöku aðstæðum sem nú eru uppi. Það er gríðarlega mikilvægt að við stöndum öll saman.“

Helgi Gríms­son, sviðsstjóri skóla- og frí­stunda­sviðs Reykja­vík­ur­borg­ar, segist vilja koma á framfæri þökkum til starfsfólks sviðsins í leik- og grunnskólum og frístundastarfi. Hefur það á liðnum vikum stuðlað að áframhaldandi námsframvindu og góðri líðan barnanna við afar óvenjulegar aðstæður.

„Við viljum einnig þakka foreldrum kærlega fyrir skilninginn á þessum fordæmalausu aðstæðum sem við störfum við. Eftir páska kemur vonandi betri tíð sem allra fyrst, en viðbúið er að einhver skerðing verði á skóla- og frístundastarfi fram eftir maímánuði,“ segir Helgi.

Hafi þor til að endurmeta stöðuna

Marta Guðjónsdóttir, borgarfulltrúi Sjálfstæðisflokksins, segir fjarvistartölur mun hærri en hún átti von á og að mikilvægt sé að fylgjast áfram grannt með þróun mála og fjölda smita í skólum borgarinnar.

„Ef þróunin fer til hins verra er mikilvægt að hafa þor til að endurmeta stöðuna og þá hvort þörf sé á að framlengja páskafrí nemenda eða grípa til lokana. Allar ákvarðanir hafa til þessa verið teknar í samráði við sóttvarnalækni og þannig viljum við halda því áfram,“ segir hún.