Morgunblaðið | 7.4.2020 | 13:50

Páskaegg afhent með aðstoð lögreglu og í sprengjubíl

Páskaeggin eru ómissandi þáttur hátíðarinnar. Ljósmynd/Landhelgisgæslan

Talsvert flækjustig var við dreifingu páskaeggja til starfsmanna Landhelgisgæslunnar vegna varúðarráðstafana sem stofnunin hefur gripið til vegna kórónuveirufaraldursins. Var því brugðið á það ráð að fá aðstoð séraðgerða- og sprengjueyðingarsveitar gæslunnar, að því er segir í fréttatilkynningu.

Egginn í öruggri fylgd til áhafnarinnar á Tý Ljósmynd/Landhelgisgæslan

„Mannauðssvið Landhelgisgæslunnar stóð frammi fyrir skemmtilegu og krefjandi verkefni þegar kom að því að færa starfsmönnum páskaegg. Þar sem varúðarráðstafanir eru miklar hjá Landhelgisgæslunni, starfsemin dreifð og fjölbreytt var nauðsynlegt að hugsa í lausnum. Mannauðssvið með Svanhildi Sverrisdóttur í fararbroddi vildi alls ekki rjúfa þessa skemmtilegu hefð, þrátt fyrir aukið flækjustig, og fékk því séraðgerða- og sprengjueyðingarsveit Landhelgisgæslunnar til liðs við sig. Sveitin, sem er sannarlega á heimavelli þegar kemur að því að finna réttu lausnirnar, gekk rösklega til verks og beitti ýmsum aðferðum við dreifingu eggjanna.“

Þá segir í tilkynningunni að páskaeggin hafi verið afhent í gegnum glugga, stillt upp undir ströngu sóttvarnaeftirliti á flugvelli og flutt með öruggum sprengjubíl um borð í varðskipið Tý í Helguvík. Auk þess var fengin aðstoð frá lögreglunni á Vestfjörðum við að koma eggjunum um borð í varðskipið Þór sem nú er til taks í Ísafjarðardjúpi vegna veðurs.