Morgunblaðið | 22.4.2020 | 14:52 | Uppfært 15:32

Björguðu hval sem festist í veiðarfærum

Hvalurinn var dreginn á haf út. Ljósmynd/Landhelgisgæslan

Áhöfninni á varðskipinu Þór tókst að bjarga hval sem festist í veiðarfærum fiskibáts suður af Langanesi í morgun. Stjórnstöð Landhelgisgæslunnar barst tilkynning um málið á ellefta tímanum og var Matvælastofnun strax gert viðvart.

Varðskipið Þór, sem var í grenndinni, var kallað út og sent á vettvang. Áhöfnin á Þór hóf björgunarstörf í samráði við MAST þegar á staðinn var komið. Skömmu síðar tókst að losa hvalinn úr veiðarfærum fiskibátsins. Eftir að hvalurinn var laus fylgdi áhöfnin honum eftir á léttbát til að ganga úr skugga um velferð dýrsins.

Þegar öll veiðarfæri voru aftur komin um borð í fiskibátinn og ljóst að ekkert varð eftir á hvalnum gat áhöfn varðskipsins haldið aftur um borð í varðskipið. Hvalurinn virtist hinn hressasti og fór sína leið.

Þetta kemur fram í tilkynningu frá Landhelgisgæslunni.