Nú þegar sólin er farin að hækka á lofti er tilvalið að kynna sér nýjustu og ferskustu herrailmina á markaðnum. Ferskur herrailmur er einnig tilvalinn til að vinna gegn grámyglunni sem kann að hafa komið fram eftir sófalegu síðustu vikurnar.
Dolce & Gabbana Light Blue Love is Love
Ómótstæðilegur sumarilmur frá ítalska tískuhúsinu þar sem viður og muska blandast sítrusávöxtum og eplum. Óvænt blanda rósmaríns, epla og pipars endurspegla vel ítölsku ástríðuna að sumri til.
Jean Paul Gaultier Le Male
Einn mest seldi herrailmur allra tíma fagnar 25 ára afmæli sínu í ár. Ákafur, munúðarfullur, nútímalegur og yndislega hlýr ilmurinn byggir á andstæðum. Hið hefðbundna mætir því djarfa, ferskleiki mætir ákefð og að sögn Gaultier eiga konur erfitt með að standast þennan ilm. Lofnarblómið kemur fyrst fram og á eftir fylgja kanill, kúmen og appelsínublóm. Botnnóturnar einkennast af vanillu og hlýjum viðarnótum.
Dior Sauvage Eau de Toilette
Hrár en í senn fágaður, þessi einstaki herrailmur frá Dior er bæði ferskur og viðarkenndur. Hann sækir innblástur í opin rými undir berum himni þar sem heitt landslag eyðimerkurinnar ræður ríkjum.
Chanel Bleu De Chanel Parfum
Bleu De Chanel endurspeglar lit frelsis en hann er að margra mati einn besti herrailmur fyrr og síðar. Hann kemur nú í ákafari „parfum“-útgáfu þar sem ferskleikinn er enn þá á sínum stað en blandast ávanabindandi viðarnótum.
Paco Rabanne 1 Million Parfum
Sólargeislar og leður einkenna þennan ákafa ilm frá Paco Rabanne en ilmurinn er seiðandi og hlýr. Þegar hönnuðir ilmsins, þeir Quentin Bisch og Christophe Raynaud, voru á ferðalagi brotnaði flaska af sólarvörn og sítrusilmi. Þeim fannst ilmurinn svo góður að úr varð 1 Million Parfum. Þessi ilmur er ákafur, extra og fer ekki fram hjá neinum.
Jimmy Choo Urban Hero
Sjálfsöruggur og leyndardómsfullur karlmaðurinn er innblástur Urban Hero frá Jimmy Choo. Fullkominn fyrir óvæntar kvöldstundir í borginni en ilmurinn einkennist af áköfum viðarnótum, leðri og hlýjum pipar.
Emporio Armani Stronger With You Freeze
Þessi nýi ilmur er bæði arómatískur, örlítið sætur og ferskur. Límónur, engifer, appelsínur og epli einkenna ilminn í fyrstu en hjarta hans einkennist af lofnarblómum, salvíu og kardamommu. Þessar gómsætu ilmnótur liggja svo á botni vanillu, Guaiac-viðar og Marron Glaze.