Morgunblaðið | 27.4.2020 | 6:54 | Uppfært 8:31

Sóttu veikan sjómann til Eyja

TF-EIR í Vestmannaeyjum í gær. Ljósmynd Landhelgisgæslan

Þyrla Landhelgisgæslunnar sótti veikan sjómann til Vestmannaeyja á ellefta tímanum í gærkvöldi og flutti á Landspítalann.

Samkvæmt upplýsingum frá Landhelgisgæslunni lagði áhöfn þyrlunnar af stað austur með GSM-miðunarbúnað í nótt vegna fólks sem óttast var um við Þverártindsegg í Kálfafellsdal í Suðursveit en sneri við eftir að fólkið fannst heilt á húfi.

Kristján Birnir Arnar, flugvirku og spilmaður um borð í TF-GRO í nótt. Ljósmynd Landhelgisgæslan

Uppfært klukkan 8:06

„Maðurinn veiktist um borð í fiskiskipi sem var rétt austur af Vestmannaeyjum. Skipið sigldi til Vestmannaeyja þar sem TF-EIR, þyrla Landhelgisgæslunnar, sótti manninn og flutti til Reykjavíkur.

Þá var þyrla Landhelgisgæslunnar kölluð út til leitar í nótt að tveimur göngumönnum sem höfðu ekki skilað sér til byggða. Talið var að þeir vær á göngu á Þverártindi. TF-GRO tók á loft frá Reykjavíkurflugvelli á þriðja tímanum en áhöfnin hafði meðferðis nætursjónauka, hitamyndavél og búnað til að finna GSM síma. Stuttu eftir að þyrlan hélt frá Reykjavík fannst fólkið heilt á húfi en það hafði seinkað upphaflegri ferðaáætlun. Þyrlan sneri því við og lenti aftur í Reykjavík,“ segir í tilkynningu frá Landhelgisgæslunni.