Morgunblaðið | 29.4.2020 | 11:53

30 sagt upp hjá Fríhöfninni og engin sumarstörf

30 manns hefur verið sagt upp hjá Fríhöfninni og engar sumarráðningar verða í framlínustörfum hjá Isavia þetta árið. mbl.is/Eggert

30 starfsmönnum hefur verið sagt upp hjá Fríhöfninni, dótturfélagi Isavia, vegna áhrifa kórónuveirufaraldursins. Auk þess verður rúmlega 100 starfsmönnum boðið áframhaldandi starf en í lægra starfshlutfalli. Áður en gripið var til aðgerðanna í dag störfuðu 169 manns hjá Fríhöfninni. Þetta kemur fram í tilkynningu frá Isavia.

Tekjur félagsins hafa dregist saman um 98 prósent frá því að faraldurinn braust út í upphafi árs. Engar sumarráðningar verða í framlínustörfum hjá Isavia í ár. Það kemur til viðbótar við þær aðgerðir sem gripið var til í lok mars þegar 101 starfsmanni félagsins var sagt upp störfum vegna áhrifa kórónuveirunnar og 37 til viðbótar boðið áframhaldandi starf í lægra starfshlutfalli.

„Frá upphafi faraldursins hefur verið lögð áhersla á að verja störf eins og hægt er. Um síðustu mánaðamót var tekin sú ákvörðun að segja ekki upp föstu starfsfólki en ráða ekki í sumarstörf hjá Fríhöfninni. Málin hafa hins vegar þróast þannig að nú er útlit fyrir að flugumferð muni verða afar takmörkuð næstu mánuði og tímabilið þar sem áhrifa Covid 19 gætir verði lengra en vonast var til,“ er haft eftir Þorgerði Þráinsdóttur, framkvæmdastjóra Fríhafnarinnar, í tilkynningu.

Stóð til að ráða 140 í sumarstörf

Áður en áhrifa kórónuveirufaraldursins fór að gæta var áformað að ráða 140 manns í sumarafleysingar hjá Isavia. Ekki eru fyrirhugaðar frekari aðgerðir hjá móðurfélagi Isavia og dótturfélögunum Isavia ANS og Isaiva Innanlands að svo stöddu.

Sveinbjörn Indriðason, forstjóri Isavia, segir að óvissan um framhaldið í flugtengdum rekstri sé enn afar mikil og útilokar hann ekki að grípa þurfi til frekari aðgerða síðar. „Við fylgjumst áfram vel með þróun mála, þeim ákvörðunum sem stjórnvöld um allan heim taka varðandi opnun landamæra og því sem flugfélög ákveða að gera í framhaldinu. Við höfum lagt mikla áherslu á mikilvægi þess að við verðum reiðubúin til að taka við flugumferð þegar þar að kemur. Þá höfum við einnig leiðir til að hafa áhrif á ákvarðanir flugfélaga þegar kemur að því að hefja flug til og frá Íslandi á ný. Við erum í þeirri stöðu fjárhagslega að geta enn sem komið er leyft okkur að horfa til haustsins en ekki einungis til næstu vikna eða örfárra mánaða,“ er haft eftir Sveinbirni.