Morgunblaðið | 29.4.2020 | 10:12

Samþykktu myndavélaeftirlit við löndun

Allur uppsjávarfiskur sem landaður er í höfnum sem taka við meira en 3.000 tonnum af uppsjávarfiski á ári skal vigtaður undir myndavélaeftirliti samkvæmt samningi Færeyja, Evrópusambandsins og Noregs. mbl.is/Þorgeir Baldursson

Færeyjar, Evrópusambandið og Noregur gerðu í síðustu viku samning sín á milli um sameiginlegt eftirlit með uppsjávarfiski sem tilheyrir deilistofnum aðilanna. Samningurinn felur í sér samstarf um eftirlitsaðgerðir á Norður-Atlantshafi út árið 2020, að því er fram kemur á vef sjávarútvegsráðuneytis Færeyja.

Nánar tiltekið varðar þetta eftirlit með veiðum á kolmunna, makríl og norsk-íslenskri síld, auk brynstirtlu. Fulltrúar frá Grænlandi og Íslandi sátu fund um samræmingu eftirlitsaðgerða sem fór fram í janúar í Lundúnum undir formennsku Noregs, en ríkin eru ekki aðilar að samningnum þar sem þau eru ekki aðilar að samningum um ráðstöfun umræddra fiskistofna.

Samningsaðilar hafa með samningnum samþykkt samræmdar reglur um vigtun afla við löndun og er meðal annars kveðið á um að að lágmarki skuli vigta 5% við hverja löndun og 7,5% af lönduðu magni undir eftirliti. Jafnframt er skylda að öll vigtun fari fram undir myndavélaeftirliti í þeim höfnum þar sem landað er meira en 3.000 tonnum af uppsjávarfiski á ári.