Foreldrar fimm barna við Fossvogsskóla segja að börnin finni áfram fyrir einkennum eftir að skólinn var opnaður á nýjan leik eftir framkvæmdir upp á tæpan hálfan milljarð króna vegna mygluskemmda.
Þetta kemur fram í Fréttablaðinu.
Á meðal einkenna eru blóðnasir, magaverkir og slæmir höfuðverkir eftir dvöl í skólanum og eiga börnin öll það sameiginlegt að einkennin hverfa er þau breyta um umhverfi.
Að sögn Reykjavíkurborgar er búið að fjarlægja allt skemmt efni eftir ítarlegar úttektir verkfræðistofa, koma í veg fyrir frekari leka og þrífa skólann hátt og lágt. Heilbrigðiseftirlit Reykjavíkur hefur ekki gert frekari athugasemdir við húsnæðið.