Morgunblaðið | 13.5.2020 | 18:00

Gefa heilbrigðisstarfsfólki flugferðir

Qatar Airways sendir þakkir til heilbrigðisstarfsfólks. AFP

Flugfélagið Qatar Airways þakkar heilbrigðisstarfsfólki fyrir framlag sitt í baráttunni gegn kórónuveirunni með 100 þúsund fríum flugmiðum.

Í færslu á vef flugfélagsins sem birt var í gær, 12. maí, kemur fram að heilbrigðisstarfsfólk geti sótt um allt að tvær fríar flugferðir með flugfélaginu fyrir sig og eina manneskju í viðbót.

Þar að auki býður flugfélagið heilbrigðisstarfsfólki upp á 35 prósenta afslátt í fríhöfn sinni í Hamad International Airport í Doha í Katar.

Í færslunni segir að heilbrigðisstarfsfólk þurfi að skila inn umsókn fyrir miðnætti 18. maí. Flugfélagið mun gefa ákveðnum fjölda heilbrigðisstarfsmanna í hverju landi kóða daglega.

Qatar Airways hefur flogið til 30 áfangastaða meðan kórónuveiruheimsfaraldurinn hefur geisað og hyggst stækka áætlun sína í lok maí og bæta við rúmlega 50 áfangastöðum. Í byrjun júní er gert ráð fyrir að flugfélagið fljúgi til rúmlega 80 áfangastaða.

Qatar Airways hefur haldið áfram að fljúga til 30 áfangastaða á meðan heimsfaraldurinn geisar. AFP

Stöndum saman

Við hjá Árvakri viljum vekja athygli á því sem vel er gert á þessum erfiðu tímum. Ef þú ert með góða sögu af fyrirtækjum og einstaklingum sem eru að gera gott, sendu okkur ábendingu á netfangið stondumsaman@mbl.is.

Stöndum saman