Morgunblaðið | 13.5.2020 | 19:04 | Uppfært 19:48

Óboðleg veiðistjórnun að mati Bárunnar

Mikið er deilt um tilhögun grásleppuveiða, en vertíðinni er nú lokið eftir að veiðarnar voru bannaðar 3. maí. mbl.is/Sigurður Ægisson

Stjórn smábátafélagsins Bárunnar í Hafnarfirði segir núverandi stjórnkerfi grásleppuveiða „óboðlegt“ og leggur til að komið verði á kvótakerfi á grásleppu eins og öðrum tegundum, að því er segir í ályktun stjórnar sem send hefur verið fjölmiðlum.

Talsvert hefur verið deilt um tilhögun veiðanna að undanförnu og aðferðafræði Hafrannsóknastofnunar er varðar útgáfu veiðiráðgjafar fyrir tegundina.

Frétt af mbl.is

Segir mistök Hafró kosta allt að 600 milljónir

Þar segir að það sé „illgerlegt að stjórna heildarafla samkvæmt ráðgjöf Hafró með sóknardögum. Reynslan hefur sýnt að afli er mjög misjafn milli ára.“ Að auki telur stjórnin það „mjög óhagkvæmt og með öllu óásættanlegt“ að grásleppusjómenn geti átt von á því að veiðar verði stöðvaðar með litlum fyrirvara.

Frétt af mbl.is

Vill setja grásleppu í kvóta

Telur stjórn Bárunnar „farsælast að stjórna grásleppuveiðum með aflamarki eins og hefur orðið með aðrar fisktegundir við Íslandsstrendur. Með aflamarki eru líkur á að takist að hámarka verðmæti auðlindarinnar betur og að aukið hagræði fyrir þá sem stunda veiðarnar náist.“

Bent er á að alþjóðlega viðurkennd vottun veiðanna (MSC) sé mjög mikilvæg og þýðir almennt hærra afurðaverð. „Vottun veiðanna fæst ekki ef veitt er umfram ráðgjöf Hafró og eða meðafli, fuglar og spendýr er umfram viðmið.“