Morgunblaðið | 13.5.2020 | 13:17

Útkall vegna báts sem svaraði ekki stjórnstöð

Þyrla Landhelgisgæslunnar, TF-EIR, og varðskipið Týr voru send af stað í kjölfar þess að ekki náðist samband við bát út af Reykjanesi. Ljósmynd/Landhelgisgæslan

Þyrla Landhelgisgæslunnar, áhöfnin á varðskipinu Tý og sjóbjörgunarsveitir á vegum Slysavarnafélagsins Landsbjargar voru kallaðar út í hádeginu í dag vegna báts sem datt úr sjálfvirkri tilkynningarskyldu og svaraði ekki kalli stjórnstöðvar Landhelgisgæslunnar þrátt fyrir ítrekaðar tilraunir, segir í tilkynningu frá Landhelgisgæslunni.

Fram kemur að hafist var handa við að ná sambandi við bátinn og skip á svæðinu þegar merki frá bátnum hætti að berast stjórnstöð Landhelgisgæslunnar en bar það ekki árangur.

Báturinn var staddur um þrjár sjómílur vestur af Stafnesi þegar síðast var vitað um hann og var einn um borð. Þegar tilraunir til að komast í samband við bátinn báru engan árangur var ákveðið að kalla út þyrlu Landhelgisgæslunnar, áhöfnina á varðskipinu Tý auk sjóbjörgunarsveita frá Sandgerði.

Þá segir að þyrlan hafi tekið á loft frá Reykjavík klukkan 12:20 en skömmu síðar náðist samband við línubátinn Bergvík, sem var í grenndinni, í gegnum farsíma. Þá kom í ljós að báturinn sem saknað var hafði orðið rafmagnslaus og gat ekki komið vél í gang.

Um það leyti sem línubáturinn Bergvík kom að náðist að koma vél bátsins í gang. Hann heldur nú til hafnar í fylgd Bergvíkur. Að auki siglir bátur frá björgunarsveitinni í Sandgerði á móti til að gæta fyllsta öryggis.

Í tilkynningunni kveðst Landhelgisgæslan leggja ríka áherslu á að sjófarendur sinni hlutvörslu á rás 16 sem getur reynst lífsnauðsynleg í neyð.