Morgunblaðið | 15.5.2020 | 13:33

21% minni afli í apríl

Afli íslenskra fiskiskipa vcar mun minni í apríl í ár miðað við sama mánuð í fyrra. mbl.is/Árni Sæberg

Afli íslenskra fiskiskipa var 88,8 þúsund tonn í apríl sem er 21% minni afli en í apríl 2019, að því er fram kemur á vef Hagstofu Íslands. Þar segir að þorskafli hafi verið svipaður milli ára í aprílmánuði. Hins vegar var verulegur samdráttur í veiðum á ýsu, ufsa og karfa.

Þá segir að samdráttur var einnig í uppsjávarafla þar sem landað magn kolmunna dróst saman um 31%. 3.601 tonnum var landað af grásleppu og rauðmaga í apríl, þar af var tæplega 60% landað á Norðurlandi sem er nokkur aukning miðað við fyrri ár.

Frá maí 2019 til apríl 2020 nam heildarafli 966 þúsund tonnum sem er 13% minni afli en á sama tímabili ári fyrr.