Morgunblaðið | 26.5.2020 | 9:05

Fjárfestu í vigtunarbúnaði fyrir 100 milljónir

Nýi vigtunarbúnaðurinn ásamt skiljubúnaði fyrir sjó. Færibandið fremst á myndinni er til að taka prufur svo unnt sé að sjá aflasamsetningu. Ljósmynd/Smári Geirsson

Unnið er að uppsetningu nýs vigtunarbúnaðar í fiskiðjuveri Síldarvinnslunnar í Neskaupstað. Nýi búnaðurinn vigtar afla uppsjávarskipanna strax og hann kemur á land, áður en hann fer inn á flokkara, að því er fram kemur á vef Síldarvinnslunnar.

Fram kemur að aðferðafræðin við vigtunina sé sambærileg þeirri sem tíðkast víða erlendis, til að mynda í Noregi, Danmörku og Færeyjum. Búnaðurinn er framleiddur af Marel og danska fyrirtækinu Hillerslev og nemur fjárfestingin um 100 milljónum króna. Þá er uppsetningin langt á veg komin og er gert ráð fyrir að búnaðurinn verði tilbúinn til notkunar þegar makrílvertíð hefst um mánaðamótin júní/júlí.

„Með tilkomu þessa nýja vigtunarbúnaðar verður fiskiðjuverið eina uppsjávarvinnslan á landinu sem vigtar allan afla áður en vinnsluferill hefst, en flestar vinnslur byggja á afurðavigtun. Búnaðurinn er mjög vandaður og höfum við fulla trú á að hann muni virka vel. Með tilkomu þessa nýja búnaðar er unnt að dæla fisknum í land með meiri sjó en ella og það minnkar álagið á fiskinum í dælingunni og fer því betur með hann. Búnaðurinn mun því leiða af sér aukin framleiðslugæði,“ segir Jón Már Jónsson, yfirmaður landvinnslu hjá Síldarvinnslunni.