Morgunblaðið | 29.5.2020 | 21:39

Fjárfestahópur kaupir Norðanfisk af Brimi

Það var hátt á hjalla eftir að kaupsamningurinn var undirritaður. Ljósmynd/Aðsend

Hópur fjárfesta á Akranesi hefur undirritað kaupsamning við Brim hf. um kaup á öllu hlutafé Norðanfisks ehf. Norðanfiskur sérhæfir sig í framleiðslu, sölu og dreifingu á úrvals sjávarfangi til veitinga- og stóreldhúsa á innanlandsmarkaði ásamt sölu neytendapakkningum um allt land.

Þetta kemur fram í tilkynningu frá Norðanfiski en þar kemur einnig fram að fyrirtækið hafi það að leiðarljósi að þjónusta íslenskan veitinga- og smásölumarkað með gæða- og hollustuvörum úr sjávarfangi ásamt því að vera áreiðanlegur og leiðandi birgi fyrir sína viðskiptavini með úrvals þjónustu í að verða 20 ár.

Kaupin sýni styrk fjárfestahópsins

„Það er öflugur hópur, sem kaupir félagið, sem er að veðja á framtíðarsýn og forystu Sigurjóns Gísla Jónssonar framkvæmdastjóra sem er meðal hluthafa. Norðanfiskur er traust og gott félag sem þjónustar stóreldhús, verslanir og veitingastaði. Það er mikilvægt að Norðanfiskur verði áfram á Akranesi og við sjáum mikil tækifæri til sóknar,“ segir Inga Ósk Jónsdóttir fyrir hönd fjárfestahópsins í tilkynningu.

Þakkar hún stjórnendum og starfsfólki Brims fyrir faglega vinnu í söluferlinu og bætir því við að það sýni styrk fjárfestahópsins að hann sé í sókn á þessum óvissutímum í íslensku efnahagslífi.

Brim óskar nýjum eigendum velfarnaðar

„Rekstur Norðanfisks á sér langa og farsæla sögu á Akranesi og Brim fagnar því að kaupendur séu öflugur hópur heimamanna og óskar félagið þeim velfarnaðar í framtíðarþróun félagsins.“ segir Kristján Þ. Davíðsson, stjórnarformaður Brims, í tilkynningunni.

Ráðgjafar kaupenda í ferlinu voru Sævar Freyr Þráinsson, bæjarstjóri á Akranesi, KPMG og Lex. Íslensk Verðbréf var ráðgjafi og stýrði söluferlinu fyrir hönd Brims.

Kaupsamningurinn er undirritaður með fyrirvara um niðurstöður áreiðanleikakönnunar. Gangi þeir fyrirvarar eftir má gera ráð fyrir að gengið verði frá viðskiptunum á næstu vikum.