Morgunblaðið | 3.6.2020 | 21:56

Stærsta samkoma frá upphafi samkomubanns

Stúlka tekur mynd af sér með lögreglumönnum á samstöðufundi í dag. mbl.is/Árni Sæberg

Þrátt fyrir að lögreglan ætli ekki að gefa út neinar opinberar tölur um fjölda fólks á samstöðufundi á Austurvelli sem haldinn var í dag þá telur Ásgeir Þór Ásgeirsson, yfirlögregluþjónn, nokkuð ljóst að um hafi verið að ræða stærstu samkomu síðan samkomubanni vegna útbreiðslu kórónuveiru var komið á um miðjan mars.

Samstöðufundurinn var haldinn til stuðnings svörtum Bandaríkjamönnum og til þess að mótmæla lögregluofbeldi í Bandaríkjunum.

Frétt af mbl.is

Fjöldi fólks kominn saman á Austurvelli

„Algjörlega til fyrirmyndar“

Mikill fjöldi kom saman á Austurvelli og hlýddi á frásagnir svartra Bandaríkjamanna sem búsettir eru á Íslandi. Einhverjir hafa áætlað að 3.500 - 5.000 manns hafi mætt á samstöðufundinn en það er ekki opinber tala.

Lögreglan þurfti ekki að hafa nein afskipti af þeim sem komu saman á Austurvelli og segir Ásgeir að fundurinn hafi verið „algjörlega til fyrirmyndar“.

„Skipuleggjendurnir tóku sjálfir ábyrgð á sóttvörnum, dreifðu grímum og hvöttu fólk til þess að vera með grímur og færa sig utar ef það vildi halda sig í tveggja metra fjarlægð.“