Morgunblaðið | 8.6.2020 | 20:30

Skötuselur nánast horfinn úr Breiðafirði

Skötuselur nánast horfið úr Breiðafirði og Faxaflóa en þar var hann algengur á tímabilinu 1999-2012. mbl.is/Alfons Finnsson

Mikil breyting varð á stofnvísitölu lúðu í Faxaflóa og Breiðafirði og hefur hún hækkað ört síðustu ár. Jafnframt mældust vísitölur hrognkelsis og skarkola með þeim hærri frá 1996, „einkum vegna mikils afla í Breiðafirði. Hins vegar hefur skötuselur nánast horfið úr Breiðafirði og Faxaflóa en þar var hann algengur á tímabilinu 1999-2012,“ segir í niðurstöðum úr netaralli Hafrannsóknastofnunar sem birtar voru á föstudag.

Stofnvísitala þorsks er um 6% lægri en síðastliðin þrjú ár, en hún hefur verið há frá árinu 2011 eftir að hafa verið í lágmarki árin 2002-2006. Rekja má lækkun stofnvísitölunnar til að árgangur 2013 (sjö ára) er lítill og minna fékkst af átta ára fiski.“

Stofnvísitala þorsks var lægri í netaralli Hafrannsóknastofnunar nú en síðastliðinn þrjú ár. mbl.is/Hari

Fram kemur að stofnvísitala þorsks lækkar á milli ára á flestum svæðum. Stofnvísitalan í Fjörunni við Suðvesturland var óvenju lág í fyrra og hækkar talsvert milli ára, en er lægri en árin þar á undan. „Kanturinn fyrir austan Eyjar sker sig áfram úr og lítið fæst nú af þorski þar. Síðastliðinn áratug hefur vægi hrygningarsvæðanna í Faxaflóa og Breiðafirði í stofnvísitölu hrygningarþorsks aukist, en hækkun hennar frá 2011 má að stórum hluta rekja til þessara svæða.“

Vaxtarhraði eykst

Ástand þorsks er um eða undir meðaltali, samkvæmt niðurstöðunum. Tekið er fram að talsverður breytileiki er á ástandi á milli svæða, aldurs og lengdarflokka. „Verulegar breytingar hafa orðið á vaxtarhraða þorsks á rannsóknartímanum. Vaxtarhraði hefur aukist við vestanvert landið og við Norðurland, en dregið hefur aftur úr honum síðustu ár.“ Þá var vaxtarhraði þorsks við Suðausturland hár í byrjun, fór síðan lækkandi en hefur aukist lítillega aftur.

„Kynþroskahlutfall eftir aldri breytist ekki mikið hjá algengustu aldurshópum milli ára,“ segir í niðurstöðunum og hefur „hlutfall þorskhrygna á kynþroskastigi 2 verið í hærra lagi síðastliðin tvö ár á flestum svæðum sem gæti bent til þess að hrygning hafi verið heldur seinna á ferðinni“.

Þá mældist stofnvísitala ufsa há og hefur það verið tilfellið frá árinu 2016. En hún var samt lægri en í fyrra. „Þá var hún sú hæsta frá árinu 2002 þegar byrjað var að mæla ufsa. Hækkun stofnvísitölu 2019 var vegna mikillar aukningar á ufsa í Fjörunni og á Bankanum, en minni breytingar voru á öðrum svæðum.“ Fram kemur að mest hafi mælst af 7-11 ára ufsa.