Morgunblaðið | 10.6.2020 | 8:32 | Uppfært 9:14

Glassman segir af sér

Greg Glassman, upphafsmaður og forstjóri CrossFit, sagðist ekki syrgja George Floyd. Ljósmynd/Aðsend

Greg Glassman, stofnandi og forstjóri CrossFit, hefur sagt af sér sem forstjóri fyrirtækisins í kjölfar þess að ummæli hans um dauða George Floyds á stjórnarfundi CrossFit voru gerð opinber.

Frétt af mbl.is

„Við syrgjum ekki George Floyd“

Mikil ólga hefur verið innan CrossFit-heimsins undanfarna daga og hafa fjölmargir fordæmt ummæli Glassman, þeirra á meðal tvöföldu heimsmeistararnir Katrín Tanja Davíðsdóttir og Annie Mist Þórisdóttir.

Frétt af mbl.is

„Náttúrulega svakaleg heimska“

Fyrst um sinn var athygli vakin á því að Glassman hafi gert lítið úr dauða Floyds á Twitter með ummælunum „It's FLOYD-19“ við færslu þar sem rasismi var sagður lýðheilsuvandamál, auk þess sem hann kallaði CrossFit-þjálfara ógeðslega og haldna ranghugmyndum þegar hún gagnrýndi þögn CrossFit í kjölfar dauða Floyds.

Olli klofningi innan CrossFit-heimsins

Það var svo í gær sem kom í ljós að skömmu áður hafði hann látið þau ummæli falla á stjórnarfundi CrossFit að hann syrgði ekki dauða Floyds, og líklega ekkert starfsfólk hans.

Frétt af mbl.is

Reebok hættir að styrkja CrossFit-leikana

Glassman tilkynnti um afsögn sína í gær, en í kjölfar ummæla hans hefur Reebok, ásamt fleiri stórum styrktaraðilum, hætt samstarfi við CrossFit. Segist Glassman hafa valdið klofningi innan CrossFit-samfélagsins og að hegðun hans megi ekki stefna markmiðum íþróttarinnar í hættu.