Morgunblaðið | 10.6.2020 | 11:30

Kópavogsbær semur við Orkusöluna um raforku

Ármann Kr. Ólafsson bæjarstjóri og Magnús Kristjánsson framkvæmdastjóri Orkusölunnar undirrituðu samninginn og við tilefnið fékk Ármann afhent Græna ljósið frá Orkusölunni en gripurinn er staðfesting á því að fyrirtæki í viðskiptum um Orkusöluna notar einungis 100% endurnýjanlega raforku. Ljósmynd/Kópavogsbær

Kópavogsbær hefur gert samning við Orkusöluna um raforkukaup fyrir byggingar í eigu bæjarins. Samningurinn er gerður að undangengnu útboði þar sem tilboð Orkusölunnar reyndist hagkvæmast, að því er segir í tilkynningu Kópavogsbæjar.

Í útboðsgögnum var gerð krafa um að raforkan væri vottuð 100% endurnýjanleg og staðfesting á að fyrirtækið hefði leyfi til að stunda raforkuviðskipti á Íslandi.

Þess má geta að heildarnotkun Kópavogsbæjar á rafmagni fyrir stofnanir og dælustöðvar er um 12,7 GWst. á ári.