Morgunblaðið | 11.6.2020 | 19:12 | Uppfært 19:58

Brim gerist aðalstyrktaraðili Bláa hersins

Tómas J. Knútsson, stofnandi Bláa hersins, Kristján Davíðsson, stjórnarformaður Brims, með styrktar- og samstarfssamningin. Hann felur í sér að Brim verður aðalstyrkytaraðili samtakanna. Ljósmynd/Brim

Brim hf. hefur gerst aðalstyrktaraðili umhverfissamtakanna Bláa hersins og mun fyrirtækið styðja rekstur samtakanna með fjárframlögum og með faglegri aðkomu að kynningu og markaðsstarfi í þeim tilgangi að auka sýnileika umhverfissamtakanna, að því er fram kemur í færslu á vef Brims.

Þá hyggst fyrirtækið einnig taka beinan þátt í verkefnum Bláa hersins með eigin hreinsunardegi að minnsta kosti einu sinni að ári þar sem fjörur verða gengnar og hreinsaðar.

Blái herinn hefur starfað í 25 ár og leggur áherslu á baráttuna við plastmengun í hafinu með hreinsunarstörfum við strendur landsins og með hvatningu og vitundarvakningu. Samtökin hafa frá stofnun hreinsað yfir 1.540 tonn af rusli úr fjörum landsins.

Frétt af mbl.is

Nærri 30 tonn af rusli úr fjörunum

„Virðing fyrir umhverfinu og lífríki sjávar er grundvöllur starfsemi Brims og lögð er áhersla á góða umgengni um auðlindina og ábyrgar fiskveiðar svo komandi kynslóðir geti notið hennar áfram,“ segir í færslunni.

„Blái herinn undir forystu Tómasar J. Knútssonar hefur unnið frábært starf í aldarfjórðung við að hreinsa fjörur af plasti og ekki síður með því að vekja athygli á mengun í hafinu. Brim leggur mikla áherslu á sjálfbærni og umhverfismál í sínu starfi og vill sýna í verki hvernig skilningur og virðing fyrir samfélagi og umhverfi fer saman við ábyrgan og arðsaman rekstur félagsins. Það fer því vel á að Brim gangi til liðs við Bláa herinn í baráttunni við plastmengun í hafinu,“ er haft eftir Kristjáni Davíðssyni, stjórnarformanni Brims.