Morgunblaðið | 11.6.2020 | 18:41 | Uppfært 19:14

Útgáfufyrirtæki Bjarkar breytir um nafn

Björk Guðmundsdóttir. AFP

Útgáfufyrirtæki Bjarkar og Sigur Rósar í Bretlandi, One Little Indian, hefur ákveðið að breyta nafni sínu í One Little Independent.

Stofnandinn Derek Birkett segist hafa tekið ákvörðunina eftir að aðdáandi útskýrði hvernig nafn fyrirtækisins, sem hefur notast við orð sem ekki er lengur notað yfir fólk af frumbyggjaættum í Ameríku, væri móðgandi.

„Maður hefur dregið virkilega mikinn lærdóm af síðustu vikum,“ skrifaði Birkett í yfirlýsingu, að því er BBC greindi frá.

„Eftir að hafa fengið bréf frá aðdáanda Crass, sem opnaði augu mín, þar sem sagt var nákvæmlega hvernig lógóið og nafn fyrirtækisins eru móðgandi, blöskraði mér jafnmikið og honum og ég er þakklátur fyrir að hafa verið komið í skilning um hverju þarf að breyta.“

Hann hélt áfram og sagði að útgáfufyrirtækið hefði verið stofnað seint á áttunda áratugnum þegar vinir hans sóttu innblástur til „hugmyndafræði frumbyggja Bandaríkjanna“.

„Ég var nógu barnalegur á þessum tíma til að halda að nafnið og lógóið sýndi virðingu mína í garð menningarinnar,“ sagði hann. „Núna veit ég að bæði stuðla að rasisma og að þessu hefði átt að breyta fyrir löngu.“