Morgunblaðið | 12.6.2020 | 15:36

Rakst á loðnuna í Færeyjum

Þó nokkuð var um dauða loðnu í færeyska firðinum. Ljósmynd/Rodmund á Kelduni

Síðustu helgi sást nokkuð til loðnu nálægt Torshavn í Færeyjum nánar tiltekið í firðinum Kaldbaksbotn. Þetta kemur fram í tölvupósti Jan Arge Jacobsen, hjá Havstovan (hafrannsóknastofnun Færeyja), til 200 mílna. Hann segir að þar fundust fjöldi dauðra fiska (líklega að lokinni hrygningu) og torfur sáust synda í sjónum skammt frá ós Fjarðará.

Fiskurinn er sagður hafa verið um 13 til 14 sentímetrar að lengd. Ljósmynd/Rodmund á Kelduni

Loðnan uppgötvaðist af Rodmund á Kelduni þegar hann var á urriðaveiðum og tók hann myndir auk sýna sem hann sendi færeysku hafrannsóknastofnuninni. Stærð fiskanna var um það bil 13 til 14 sentímetrar.

Havstovan sendi sýni til Hafrannsóknarstofnunar (þeirrar íslensku) um miðjan maí og er beðið eftir niðurstöðum þaðan.