Morgunblaðið | 14.6.2020 | 22:47 | Uppfært 23:04

Kærður fyrir að pissa á minnisvarða

Lögreglan að störfum í gær. AFP

Maður sem er grunaður um að hafa kastað af sér vatni á minnisvarða um lögreglumann sem var drepinn í hryðjuverkaárás í London árið 2017 hefur verið kærður fyrir athæfið.

Frétt af mbl.is

Mótmælendur lentu í átökum í London

Lögreglan hóf rannsókn á málinu eftir að ljósmynd var birt á samfélagsmiðli sem virtist sýna karlmann pissa á minnisvarða um Keith Palmer, sem var drepinn í hryðjuverkaárás fyrir utan breska þinghúsið.

Talið er að atvikið hafi átt sér stað á laugardag á meðan hægriöfgahreyfingar lentu í átökum við fólk sem mótmælti kynþáttamisrétti í miðborg London.

Lögreglan þurfti að hafa mikil afskipti af fólkinu. Alls voru 113 handteknir. Sumir höfðu ráðist á lögreglumenn en 23 þeirra hlutu minni háttar meiðsli.