„Mér fannst stóllinn hreyfast undir mér,“ sagði Bjarni Magnússon, hreppstjóri í Grímsey, um skjálftann á laugardagskvöldið. Hann var þá staddur á sjávarréttakvöldi kvenfélagsins og sló þögn á mannskapinn þótt Grímseyingar séu vanari jarðskjálftum en flestir landsmenn.
„Ég fann mikið fyrir þessu. Ég bý á þriðju hæð í gömlu timburhúsi og þar lék allt á reiðiskjálfi. Húsið hristist og það glamraði í leirtaui og glermunum,“ sagði Arnar Sigurðsson, skipstjóri á Húsavík, í gærkvöldi um stóran skjálfta sem átti upptök sín norður af Eyjafirði og var stærð hans mæld 5,8. Er þetta stærsti skjálfinn í hrinunni sem staðið hefur frá því á föstudag og virðist því ekkert lát vera á henni.
Almannavarnir hafa lýst yfir óvissuástandi á Norðurlandi eystra. Veðurstofan biður fólk að búa sig undir að hrinan geti staðið áfram næstu daga og verið undanfari stærri skjálfta, að því er fram kemur í umfjöllun um jarðhræringarnar í Morgunblaðinu í dag.