Morgunblaðið | 25.6.2020 | 14:58

Prófa nýjan búnað Síldarvinnslunnar

Margrét EA kom til hafnar með 250 tonn af makríl og síld. Tilgangurinn var að prófa nýjan búnað í fiskiðjuveri Síldarvinnslunnar. Ljósmynd/Síldarvinnslan

Margrét EA kom í morgun til hafnar í Neskaupstað með 250 tonn af makríl og síld. Tilgangur veiðiferðarinnar var að sækja afla til þess að prófa nýjan og breyttan búnað í fiskiðjuveri Síldarvinnslunnar, að því er segir á vef fyrirtækisins.

En búið er að koma upp nýjum vigtunarbúnaði í verinu auk þess sem unnar hafa verið endurbætur á vinnslulínu, meðal annars með tveimur sjálfvirkum flökunarvélum frá Baader.

Frétt af mbl.is

Fjárfestu í vigtunarbúnaði fyrir 100 milljónir

Guðmundur Þ. Jónsson, skipstjóri á Margréti, segir ekki hafa verið farið langt til að sækja aflann og telur hann makrílvertíðina verða góða.

„Við fengum þetta úti í kantinum á Berufjarðarálshorni og á Papagrunni. Það var hálfgerð bræla í gær þegar við vorum að veiðum. Makríllinn er að koma þarna en hann er mjög blandaður síld. Um 70% af aflanum hjá okkur er síld. Þetta var svona prufutúr, það þurfti fisk til að prófa búnað í fiskiðjuverinu og ég reikna með að löndun hefjist nú um hádegi. Ég er mjög bjartsýnn hvað varðar vertíðina, ég held að þetta verði fínasta makrílvertíð.“

Gert er ráð fyrir að skip Síldarvinnslunnar haldi til veiða um helgina en áformað er að vertíðin hefjist að fullu 1. júlí.