Morgunblaðið | 15.7.2020 | 13:13

Gamli Herjólfur lagður af stað

Gamli Herjólfur sigldi af stað um hádegisbilið. mbl.is/Óskar Pétur Friðriksson

Gamli Herjólfur er lagður af stað frá Eyjum til lands, samkvæmt vefsíðunni Marine Traffic sem heldur meðal annars utan um komur og brottfarir skipa á heimsvísu. Fyrstu ferð Herjólfs seinkaði töluvert eftir að einn vélstjóranna gekk frá borði en framkvæmdastjóri Herjólfs sagði að seinkunin væri tilkomin vegna þess að skipið hefði legið lengi við bryggju.

Útlit er fyrir að henni hafi jafnvel verið aflýst þar sem ferjan átti að halda til lands fjórum sinnum í dag, klukkan 9:30, 12:00, 17:00 og 19:30

Frétt af mbl.is

Vélstjóri hafi gengið í land

Verkfall félagsfólks í Sjómannafélagi Íslands stendur nú yfir og getur nýi Herjólfur ekki siglt vegna þess. Að sögn Bergs Þorkelssonar, formanns sjómannafélags Íslands, hafði hann fengið upplýsingar um að forseti bæjarstjórnar hafi hlaupið í skarð verkstjórans sem ákvað að taka ekki þátt í siglingunni.