Hættur eftir 48 ár til sjós

Nýverið kom Halldór Hjálmarsson úr sinni síðustu veiðiferð með Málmey SK-1 og af því tilefni afhenti Gylfi Guðjónsson útgerðarstjóri honum blóm og gjafakort frá FISK og samstarfsfólki, með kæru þakklæti fyrir samstarfið og vinnu í þágu fyrirtækisins í áratugi. Frá þessu segir á vefsíðu FISK Seafood.

Halldór hóf störf hjá FISK árið 1987 og hefur því verið hjá fyrirtækinu í 33 ár, þar af sem kokkur frá 1991. Áður var hann á sjó á bátum frá Grindavík í 15 ár og árin til sjós því orðin 48.

„Það er margs að minnast frá löngum ferli en eftirminnilegar eru löngu ferðirnar í Smuguna og einnig siglingar erlendis um jólin sem voru erfiðar fyrir fjölskyldufólk. Spurður um matarhefðir sjómanna sagði Dóri að fiskurinn og lambakjötið væri alltaf vinsælt og klikkaði aldrei, en yngri mennirnir vildu gjarnan hafa pizzur og hamborgara,“ segir í frétt FISK.

Samkvæmt fréttinni segist Dóri ekki kvíða verkefnaleysi þótt hann hætti til sjós. Hann hlakkar til að eyða tíma með barnabörnunum og fjölskyldunni. Þakkar hann samstarfsfólki og stjórnendum FISK fyrir ánægjulegt samstarf.

„Strákarnir eru búnir að segja ,,takk fyrir mig“ í öll þessi ár og nú segi ég takk fyrir mig,“ er vitnað til Halldórs að endingu í fréttinni.