Morgunblaðið | 12.8.2020 | 16:30

Fluttu út fyrir 13,5 milljarða króna

Útflutningur eldisafurða á fyrstu sex mánuðum árs hefur aldrei verið meira. Ástæðan er sögð samspil hagstæðs afurðaverðs, gengi krónunnar og framleiðsluaukningu. mbl.is/Þorgeir

Á fyrsta árshelmingi nam útflutningsverðmæti eldisafurða 13,5 milljörðum króna og er það 11% meira en á sama tímabili í fyrra þegar það nam 12,1 milljarði. Útflutningsverðmæti afurða af þessum toga hafa aldrei verið meiri á fyrstu sex mánuðum árs, að því er fram kemur í grein á Radarnum, mælaborði sjávarútvegsins sem Samtök fyrirtækja í sjávarútvegi standa að.

Þar segir að lækkað gengi krónunnar hafi átt verulegan þátt í aukningunni milli ára, en ef útflutningsverðmætið er mælt í erlendri mynt var aukningin 4%. Bent er á að fiskeldi er ein fárra útflutningsgreina sem hefur skilað meiri útflutningstekjum í ár en í fyrra.

Mynd/Radarinn

Sveiflur milli fjórðunga

Kórónuveirufaldurinn er talinn hafa haft veruleg áhrif á starfsemi fiskeldisfyrirtækja. „Þessi áhrif koma bersýnilega fram þegar litið er á þróun í útflutningi á fyrsta og svo öðrum ársfjórðungi, en áhrifa COVID-19 byrjaði að gæta um miðjan mars.“

Talið er að samverkandi þættir hafi haft áhrif á aukningu útflutningsverðmæta á fyrsta ársfjórðungi og er vísað til þess að útflutningsmagn jókst, afurðaverð þróaðist með hagstæðum hætti auk þess sem gengi krónunnar studdi við greinina.

Frétt af mbl.is

Mikil verðlækkun á laxi

„Á hinn bóginn dróst útflutningsverðmæti saman á milli ára á öðrum ársfjórðungi á sama tíma og útflutt magn stóð nánast í stað. Þann samdrátt má einkum rekja til verulegrar lækkunar á afurðaverði en gengislækkun krónunnar vóg þó aðeins upp á móti,“

Samdráttur í júlí

Mikill samdráttur varð í útflutningsverðmætum í apríl og maí, en aukning verður í júní. „Endurspeglar þessi þróun ágætlega ástandið á mörkuðum á hverjum tíma.“

Frétt af mbl.is

Yfir 40% verðhækkun á fjórum vikum

Fram kemur að bráðabirgðatölur sýni að vísbendingar eru um að útflutningsverðmæti eldisafurða hafi svo dregist saman á milli ára í júlí. Byggist það á því að tölur Hagstofu Íslands um útflutning landbúnaðarafurða hafi numið 1,7 milljarða í júlí sem er um 9% samdráttur miðað við sama tímabil í fyrra. En eldisafurðir flokkast undir landbúnað í opinberum útflutningstölum og eru jafnframt langstærsti þátturinn í þeim flokki.