Morgunblaðið | 18.8.2020 | 13:46 | Uppfært 14:44

Kjaraviðræður skipverja Herjólfs sigldar í strand

Deiluaðilar hafa óskað eftir því að ríkissáttasemjari leiði viðræður. Mynd/mbl.is

Hvorki gengur né rekur í viðræðum samninganefnda Sjómannafélags Íslands og Herjólfs ohf. í kjaradeilu skipverja Herjólfs. Sáttafundi, sem hófst klukkan tíu í morgun, lauk nú rétt fyrir hádegi í dag og niðurstaðan var sú að óska eftir því að ríkissáttasemjari taki að sér að leiða viðræðurnar.

Þetta staðfestir Jónas Garðarsson, formaður samninganefndar Sjómannafélags Íslands, í samtali við mbl.is.

Kjaradeilan hefur nú staðið yfir í þó nokkurn tíma, með hléum þó, og var henni vísað til ríkissáttasemjara í febrúar síðastliðnum þó að lítið hafi verið um fundi á þeim vettvangi að sögn Jónasar. Nú er hins vegar ljóst að aðkomu sáttasemjara er þörf.

Náðu ekki saman á grundvelli viðræðuáætlunar

Sjómannafélag Íslands boðaði þrjár vinnustöðvanir í júlí en áður en sú þriðja hófst ákvað félagið að hverfa frá henni og deiluaðilar samþykktu viðræðuáætlun.

„Menn eru búnir að funda í tvígang um hana og niðurstaðan er sú að menn ná ekki saman á þeim grundvelli þannig að ríkissáttasemjari þarf að koma að málum og leiða menn í gegnum þetta,“ segir Guðbjartur Ellert Jónsson, framkvæmdastjóri Herjólfs ohf., í samtali við mbl.is.

Fréttin hefur verið uppfærð.