Morgunblaðið | 20.8.2020 | 15:00 | Uppfært 15:26

RÚV ekki með gögnin um Samherja

Í svari sínu til lögmanns Samherja segir Stefán Eiríksson, útvarpsstjóri, RÚV ekki hafa í vörlum sínum gögnin sem Kastljós árið 2012 byggði umfjöllun sína á um meint brot Samherja á þágildandi gjaldeyrislögum. mbl.is/Sigurður Bogi

Ríkisútvarpið býr ekki yfir skjalinu sem Kastljós byggði umfjöllun sína á 27. mars 2012 um Samherja og meinta sölu afurða á undirverði til dótturfélags erlendis. Þetta kemur fram í svari Stefáns Eiríkssonar útvarpsstjóra við beiðni Samherja um að fá umrætt skjal afhent, að því er fram kemur í færslu á vef fyrirtækisins.

„RÚV hefur ekki umrætt skjal í fórum sínum lengur. Það var notað við vinnslu Kastljóssþáttar árið 2012 og afhent Seðlabankanum að hans ósk í febrúar það ár,“ segir í svari Stefáns. Þá hvetur hann Samherja frekar til þess að beina fyrirspurninni að Verðlagsstofu skiptaverðs eða Seðlabanka Íslands.

Frétt af mbl.is

Óska eftir að skýrslan verði afhent Samherja

Í færslunni er fullyrt að svar útvarpsstjórans bendi til þess að þegar Stefán og Rakel Þorbergsdóttir fréttastjóri RÚV í síðustu viku í yfirlýsingu mótmæltu ásökunum Samherja, um að Helgi Seljan fréttamaður hafi átt við gögn um meinta sölu og að ekki væri til skýrsla sem studdi ásakanir í garð Samherja, höfðu þau ekki séð umrædd gögn.

„Svar útvarpsstjóra við erindi lögmanns Samherja bendir til þess að útvarpsstjóri og fréttastjóri hafi í reynd ekki vitað hvort Ríkisútvarpið hefði skýrsluna undir höndum, eða hvers eðlis skýrslan væri, áður en yfirlýsingin var birt. Eru því sterkar vísbendingar um fullyrðingar í yfirlýsingunni hafi verið settar fram án vitneskju um hvort þær væru sannar,“ segir í færslunni.