Morgunblaðið | 1.9.2020 | 15:35 | Uppfært 16:12

Engin siðanefnd til að taka við kæru Samherja

Ekki var skipuð siðanefnd hjá RÚV í fyrra í samræmi við siðareglur. Í kjölfar kæru Samherja á hendur starfsmanna er óskað eftir tilnefningum í nefndina. mbl.is/Eggert Jóhannesson

Engin siðanefnd var skipuð í fyrra í samræmi við siðareglur Ríkisútvarpsins og er því engin starfandi nefnd til að taka við kærunni frá Samherja á hendur ellefu starfsmönnum Ríkisútvarpsins vegna tjáningar þeirra á samfélagsmiðlum um mál er tengjast Samherja.

Frétt af mbl.is

Samherji kærir ellefu til siðanefndar RÚV

„Endurskoðun siðareglna RÚV hefur staðið yfir frá síðasta ári og hefur því ekki verið endurskipað í nefndina. Í ljósi framkominnar kæru til siðanefndar hefur verið óskað eftir tilnefningum í nefndina og að þeim fengnum verður kæran send nefndinni til meðferðar,“ segir í svari Ríkisútvarpsins við fyrirspurn 200 mílna um hverjir eiga sæti í siðanefndinni.

Þá segir einnig að „siðanefnd RÚV var skipuð haustið 2016 til þriggja ára í samræmi við siðareglur RÚV. Gunnar Ingi Jóhannsson var þá skipaður formaður nefndarinnar. Aðrir nefndarmenn voru Guðmundur Heiðar Frímannsson, aðalmaður fyrir hönd Siðfræðistofnunar Háskóla Íslands og Grétar J. Guðmundsson til vara og Sigríður Árnadóttir, aðalmaður fyrir hönd Starfsmannasamtaka RÚV, og G. Pétur Matthíasson til vara.“