Morgunblaðið | 1.9.2020 | 10:54 | Uppfært 13:37

Samherji kærir ellefu til siðanefndar RÚV

Samherji hefur ákveðið að kæra ellefu starfsmenn RÚV fyrir brot á siðareglum. mbl.is/Sigurður Bogi

„Lögmaður Samherja hefur lagt fram kæru fyrir siðanefnd Ríkisútvarpsins á hendur ellefu nafngreindum frétta- og dagskrárgerðarmönnum vegna þátttöku þeirra í þjóðfélagsumræðu um málefni Samherja á samfélagsmiðlum,“ segir í tilkynningu á vef Samherja sem birt var í dag.

Þar segir að öll þau tilvik sem koma fram í kærunni varði starfsmenn sem sinna umfjöllun um fréttir, fréttatengd efni og dagskrárgerð og er því haldið fram að allir hafi tekið afstöðu til mála er tengjast Samherja og eru sérstaklega nefnd Seðlabankamálið og starfsemi Samherja í Namibíu, auk annarra mála svo sem eignarhalds fyrirtækja í sjávarútvegi og eignarhalds á hlutabréfum í Eimskip.

Er kæran sögð byggjast á ákvæði siðareglna Ríkisútvarpsins en þar segir: „Starfsfólk sem sinnir umfjöllun um fréttir, fréttatengt efni og dagskrárgerð tekur ekki opinberlega afstöðu í umræðu um pólitísk málefni eða umdeild mál í þjóðfélagsumræðunni, þ.á m. á samfélagsmiðlum.“

Brot sögð ítrekuð

Þá segir í tilkynningu Samherja að ljóst sé að umræddir starfsmenn Ríkisútvarpsins hafi gerst brotlegir við siðareglurnar. „Þá virðist sem um sé að ræða samantekin ráð þar sem margar þeirra færslna, sem fjallað er um í kærunni, voru birtar á samfélagsmiðlum því sem næst samtímis. Gerir það brotin enn alvarlegri,“ segir í tilkynningu Samherja og er tekið sérstaklega fram að áhersla sé á meint brot þeirra starfsmanna sem sagðir eru hafa ítrekað gerst brotlegir.

„Þarna er um margítrekuð brot að ræða hjá sumum þeirra einstaklinga sem eiga í hlut. Þá virðist hópur manna, sem starfa við fréttir og dagskrárgerð, hafa haft samantekin ráð um að skaða orðspor Samherja. Af þessu er augljóst á Samherji á engan möguleika á því að fá hlutlausa umfjöllun hjá Ríkisútvarpinu,“ er haft eftir Þorsteini Má Baldvinssyni, forstjóra Samherja, í tilkynningunni.

Nöfn þeirra sem kærð eru til siðanefndar RÚV: