Morgunblaðið | 5.9.2020 | 9:43

Segist saklaus af ákæru um kynferðisbrot

Íbúar Kenosha hafa mótmælt lögregluofbeldi í Bandaríkjunum í kjölfar þess að Blake var skotinn 7 sinnum í bakið af lögreglu. AFP

Jacob Blake, svartur bandarískur karlmaður sem lögreglumenn í borginni Kenosha í Wisconsinríki skutu sjö sinnum í bakið, lýsir sig saklausan af ákærum sem lögregla lagði fram áður en atvikið átti sér stað.

Blake, sem er á sjúkrahúsi og sagður lamaður fyrir neðan mitti, er ákærður fyrir að hafa farið inn á eign annars í leyfisleysi, kynferðisbrot og óspektir sem fyrrverandi kærasta hans hefur sakað hann um. Fram kemur í ákærunni að konan saki hann um að hafa brotið kynferðislega gegn sér í maí og stolið greiðslukorti og bíllyklum þegar hann flúði vettvang.

Ákærurnar voru lagðar fram í júlí og tengjast ekki skotárásinni sem varð 23. ágúst. Búist er við að réttarhöld yfir honum í málinu hefjist síðar á þessu ári. Samkvæmt BBC var Blake eftirlýstur vegna ákæranna þegar hann var skotinn af lögreglu.

Blake kom fyrir dómara á föstudag á myndbandsfundi frá sjúkrahúsinu og lýsti sig saklausan af ákærunum.