Morgunblaðið | 1.10.2020 | 14:33 | Uppfært 16:13

Þyrla Landhelgisgæslunnar kölluð út vegna elds

Þyrlan var síðan afturkölluð þegar fréttist að hættan væri liðin hjá. mbl.is/Árni Sæberg

Þyrla Landhelgisgæslunnar var kölluð út á öðrum tímanum í dag vegna elds sem upp kom í fiskiskipi úti fyrir Norðurlandi. Var sjóbjörgunarsveit Landsbjargar á Norðurlandi einnig kölluð út sem mun koma til með að flytja slökkviliðsmenn að skipinu. Þá voru önnur skip í grenndinni beðin um að halda til skipsins líka.

Áhöfn skipsins telur fjóra skipverja og náðu þeir fljótt að ráða niðurlögum eldsins og var þyrla gæslunnar því afturkölluð.

Eins og segir í tilkynningu frá Landhelgisgæslunni um málið voru tvö önnur skip ansi fljót á staðinn og því ekki hætta á ferðum. Skipið er vélarvana og verður nú dregið að landi.