Morgunblaðið | 2.10.2020 | 10:59

Meira haft fyrir makrílveiðunum en áður

Börkur NK að dæla makrílafla í Beiti NK á miðunum. Ljósmynd/Síldarvinnslan - Helgi Freyr Ólason

Nú er nýlega lokið óvenjulegri makrílvertíð sé miðað við síðustu ár. Makríllinn breytti göngum sínum og gekk í afar takmörkuðum mæli upp á landgrunnið og vestur eftir allt inn í grænlenska lögsögu eins og hann hefur gert að undanförnu, að því er fram kemur í pistli á vef Síldarvinnslunnar.

Fram kemur, að þess í stað hélt makríllinn sig lengst austur af landinu og reyndar mest á alþjóðlegu hafsvæði sem þekkt er undir nafninu Síldarsmugan.

„Makrílskipin þurftu því að sækja aflann langt og meira var haft fyrir veiðunum en á undanförnum árum. Til að bregðast við þessum breyttu aðstæðum var myndað einskonar veiðifélag þeirra skipa sem lönduðu makríl til vinnslu hjá Síldarvinnslunni í Neskaupstað. Skipin sem um ræðir voru Beitir NK, Börkur NK, Bjarni Ólafsson AK og Margrét EA,“ segir í umfjölluninni.

Fram kemur, að samstarf skipanna hafi byggst á því að hverju sinni hafi afla þeirra allra verið dælt um borð í eitt skip sem síðan flutti hann til vinnslu í landi. Skiptust skipin á um að taka aflann um borð.

„Álitið var að þetta væri skynsamlegt fyrirkomulag þegar jafn langt væri að sækja aflann og raun bar vitni. Hér er um nýjung að ræða og því kann að vera forvitnilegt að heyra viðhorf skipstjóra á umræddum skipum til samstarfsins.“

Nánari umfjöllun er að finna hér.