Morgunblaðið | 5.10.2020 | 14:33 | Uppfært 18:09

Vilja gera 20 þúsund tonna laxeldi við Þorlákshöfn

Þorlákshöfn í flugsýn. Fiskeldssvæðið er út við ströndina, efst á myndinni. mbl.is/Sigurður Bogi

Sveitarfélagið Ölfus og Fiskeldi Ölfuss hafa undirritað samkomulag um fýsileikakönnun og uppbyggingu laxeldis við Þorlákshöfn og vilyrði fyrir lóð. Með samkomulaginu hefur Fiskeldi Ölfuss undirbúning að rekstri landeldisstöðvar sem á að geta framleitt um 20.000 tonn af fullöldum eldislaxi á ári á 200.000 fermetra lóð á svæði í námunda við Þorlákshöfn. Áætluð útflutningsverðmæti gætu legið nærri 22 milljörðum.

Þetta er meðal þess sem kemur fram í fréttatilkynningu frá Ölfusi.

„Verðum að framleiða okkur út úr kreppunni“

„Komandi kreppa og versnandi staða hagkerfis okkar leggur ríka ábyrgð á okkur hjá hinu opinbera að því er lýtur að nýrri verðmætasköpun. Eins og bent hefur verið á þá verðum við að framleiða okkur út úr kreppunni og þetta verkefni er sannarlega skref í þá átt,“ segir Elliði Vignisson m.a. í tilkynningu.

Sigurður Ingi Jónsson, verkefnastjóri hjá Fiskeldi Ölfuss, segir í tilkynningunni að það sé metnaður fyrirtækisins að vera leiðandi í fulleldi á laxi á landi og aðstæður við Þorlákshöfn séu á heimsmælikvarða.

„Ölfus er að okkar mati eitt helsta vaxtarsvæði á landinu með skýra sýn á innviðauppbyggingu svo sem hvað varðar stækkun hafnarinnar og áherslu þeirra á matvælaframleiðslu. Þá er til fyrirmyndar sá skilningur sem þar er hvað varðar hagsmuni fyrirtækja eins og okkar. Við horfum til dæmis sterkt til samvinnu innan Ölfus Cluster og teljum allar forsendur til þátttöku í þeim sóknarhug sem við finnum í Ölfusi.“