Morgunblaðið | 9.10.2020 | 16:57

25. haustrallið hafið

Múlaberg SI tekur þátt í haustralli Hafrannsóknastofnunar ásamt Árna Friðrikssyni. Ljósmynd/Rammi

Hið árlega haustrall er hafið, en í því felst stofnmæling botnfiska og stendur yfir næstu fjórar vikur, að því er fram kemur á vef Hafrannsóknastofnunar. Um er að ræða 25. skipti sem stofnunin stendur að stofnmælingu botnfiska að haustlagi og hefur hún verið framkvæmd með sambærilegum hætti á hverju ári síðan 1996.

Tvö skip taka þátt í verkefninu og er það annars vegar togarinn Múlaberg SI og hins vegar rannsóknaskipið Árni Friðriksson. Sjö til tíu rannsóknamenn eru á hverju skipi auk áhafnar.

Fram kemur á vef stofnunarinnar að til stendur að toga á rúmlega 370 stöðum á hafsvæðinu umhverfis Ísland og að svæðinu er skipt í grunn- og djúpslóð og er togað niður á allt að 1.300 metra dýpi.

„Helsta markmið er að fylgjast með breytingum á stofnstærð, aldri, fæðu, ástandi og útbreiðslu botnfisktegunda við landið. Erfðasýni verða tekin úr grálúðu sem verður einnig merkt. Athuganir verða gerðar á botndýrum og mat lagt á magn ýmiskonar rusls á sjávarbotni.“