Morgunblaðið | 12.10.2020 | 20:46

Aldrei dauð stund hjá áhöfninni á Tý

Það veitir ekki af gluggaþvotti og ekki verra að geta sameinað það sigæfingu. Það er alltaf nóg að gera hjá áhöfninni á varðskipinu Tý. Ljósmynd/Guðmundur St. Valdimarsson

Það er aldrei dauð stund hjá áhöfninni á varðskipinu Tý og hefur hún sinnt ýmsum verkefnum að undanförnu.

Meðal annars fór áhöfnin í tveggja klukkustunda prufuferð á léttbáti skipsins, í blíðskaparveðri í nágrenni Reykjavíkur, en léttbáturinn Loki hefur verið í viðhaldsskoðun og allt reyndist eins og til var ætlast. Loki er af gerðinni Rafnar 850 RIB CG og var hannaður í samvinnu við Landhelgisgæsluna.

Þegar þurfti að þrífa glugga Týs var ákveðið að nýta tækifærið og skella í sigæfingu. Auk þess var komið fyrir innsiglingadufli við höfnina á Skagaströnd og rafgeymar voru hlaðnir og leiðarljós yfirfarin í Miðleiðaskeri og Skarfakletti á Breiðafirði.