Morgunblaðið | 13.10.2020 | 10:34

Framleiðsla Laxa meira en tvöfaldast

Mikil umferð er við sjókvíar Laxa fiskeldis í Reyðarfirði. Auk vinnu- og brunnbáta fyrirtækins liggja kvíarnar við siglingaleið flutningaskipa.

Laxar fiskeldi geta meira en tvöfaldað framleiðslu sína á laxi í Reyðarfirði eftir að fyrirtækið fékk starfs- og rekstrarleyfi til aukningar starfseminnar. Þegar leyfin verða fullnýtt, sem stefnt er að eftir tvö eða þrjú ár, verða útflutningsverðmæti afurðanna 12,5 til 15 milljarðar kr.

Laxar fengu starfs- og rekstrarleyfi frá Umhverfisstofnun og Matvælastofnun fyrir 10 þúsund tonna viðbót við framleiðsluna í Reyðarfirði. Unnið hefur verið í átta ár að öflun leyfanna. Fyrir var fyrirtækið með 6 þúsund tonna framleiðsluheimild og getur því aukið framleiðsluna í 16 þúsund tonn.

„Þetta er einstaklega kærkomið og gríðarlega mikilvægt fyrir félagið. Við vorum farin að gera okkur vonir um að leyfin myndu klárast í haust. Því var ákveðið á vordögum að fara í fjárfestingar til næstu tólf mánaða til að mæta væntanlegri aukningu. Við fjárfestum í seiðaeldisstöðvum okkar og kaupum á búnaði fyrir sjóeldið,“ segir Jens Garðar Helgason framkvæmdastjóri. Stór fóðurprammi sem fyrirtækið hefur fest kaup á er væntanlegur í vor.

Jens Garðar Helgason. mbl.is/Árni Sæberg

Að sögn Jens Garðars nemur fjárfestingin í seiðastöðvum félagsins í Ölfusi um 1,3 milljörðum króna og milljarði í sjóeldisdeildinni í Reyðarfirði. „Þess utan hefur þurft að fjölga starfsfólki þónokkuð. Nú er verið að auglýsa þrjár nýjar stöður í Ölfusi og fjöldi starfsmanna hér fyrir austan mun nálgast fjórða tuginn þegar búið verður að ráða í allar stöður á næsta ári,“ segir Jens Garðar. Hann bætir því við að Búlandstindur á Djúpavogi sem félagið á aðild að sé að fjárfesta fyrir um hálfan milljarð á þessu ári, meðal annars í nýjum flokkurum frá Marel og öðru vélmenni frá Samey, til að mæta aukinni vinnslu á komandi árum.

Reiknað er með að framleiðslan í ár nemi níu þúsund tonnum og hún mun aukist smám saman þangað til leyfin verða fullnýtt árið 2023.

Reyðarfjörður þolir 20 þúsund tonna framleiðslu, samkvæmt burðarþolsmati Hafrannsóknastofnunar. Hins vegar er leyfð hámarksframleiðsla 18 þúsund tonn, með skilyrðum um stærð seiða, samkvæmt áhættumati sömu stofnunar. Jens Garðar segir næstu skref ekki ákveðin en markmiðið sé þó að nýta það sem Reyðarfjörður getur gefið af sér.

Áskoranir á mörkuðum

Slátrun upp úr kvíunum í Reyðarfirði hefst í vikunni, eftir hlé vegna uppsetningar nýs búnaðar í sláturhúsinu á Djúpavogi.

Spurður um stöðuna á mörkuðum fyrir lax segir Jens að þar séu áskoranir vegna kórónuveirufaraldursins. Bjartsýni hafi ríkt í sumar um að markaðurinn væri að taka við sér en bylgjan sem nú gengur yfir Evrópu hafi þrengt að hótelum, veitingastöðum og veisluþjónustu. Því hafi starfsmenn þurft að leggja sig ennþá betur fram í sölumálunum en áður.