Morgunblaðið | 14.10.2020 | 13:39

Fjárfesting Samherja í Helguvík óráðin

Jón Kjartan Jónsson, framkvæmdastjóri fiskeldis Samherja, segir hugsanleg áform um landeldi í Helguvík aðeins til skoðunar á þessu stigi. Skapti Hallgrímsson

„Við erum búin að undirrita viljayfirlýsingu um kaup á eignum Norðuráls og við erum með þetta í frumathugun til að kanna möguleikana. Við erum að ræða við bæjaryfirvöld og skoða forsendur fyrir uppbyggingu,“ segir Jón Kjartan Jónsson, framkvæmdastjóri Samherja fiskeldis, í samtali við 200 mílur um hugsanlega uppbyggingu laxeldisstöðvar á landi á lóð Norðuráls í Helguvík.

Þá hafa átt fulltrúar Samherja fiskeldis átt fund með bæjarstjórum Reykjanesbæjar og Suðurnesjabæjar vegna málsins.

Frétt af mbl.is

Landeldisstöð Samherja „raunhæf lausn“

Spurður um hversu stóra fjárfestingu sé að ræða ef af áformunum verður, svarar Jón Kjartan að það sé erfitt að greina frá á þessu stigi. „Það veltir á mörgum forsendum varðandi möguleikana. Það eru grunnforsendurnar sem ráða stærðinni af fjárfestingunni.“ Hann segir enga endanlega ákvörðun vera tekna um uppbyggingu eldisstöðvarinnar og í ítrekar að þetta sé aðeins til skoðunar.

Byggingar sem áttu að hýsa álver kunna að verða notaðar í landeldi. mbl.is/Golli

„Við ætlum að skoða þetta á næstu vikum,“ útskýrir Jón Kjartan og bætir við að gert sé ráð fyrir að athuguninni verði lokið fyrir áramót.

Í tilkynningu sem Samherja sendir í dag er bent á að Samherji fiskeldi er þegar með eldisstöð á Stað við Grindavík og eldisstöð á Vatnsleysuströnd auk sláturhús og vinnslu í Sandgerði. Þá hafi fiskeldi fyrirtækisins einkum verið á landi og sérstaklaga verið lögð áhersla á framleiðslu bleikju en Samherji fiskeldi er stærsti framleiðandi bleikju í heiminum með tæplega 3.800 tonn árlega, en framleiðir einungis 1.500 tonn af laxi.