Morgunblaðið | 16.10.2020 | 15:35

„Mælingin er ekki marktæk“

Binni í Vinnslustöðinni óttast ekki að loðnubrestur verði þriðja árið í röð og kveðst sannfærður um að loðna finnist í janúar. Ljósmynd/Óskar Pétur Friðriksson

„Það verður loðna, þeir hafa bara ekki fundið hana. Við getum alveg verið rólegir, það finnst loðna,“ segir Sigurgeir Brynjar Kristgeirsson (Binni), framkvæmdastjóri Vinnslustöðvarinnar í Vestmannaeyjum, í samtali við 200 mílur inntur álits á ráðgjöf Hafrannsóknastofnunar um að ekki verði loðnuveiðar á vertíðinni 2020/2021, sem tilkynnt var á vef stofnunarinnar í dag.

Samkvæmt heimildum 200 mílna stendur nú yfir fundur þar sem Hafrannsóknastofnun fer yfir ráðgjöf stofnunarinnar með fulltrúum útgerðanna.

Frétt af mbl.is

Loðnubrestur kann að verða þriðja árið í röð

„Ungloðnumælingar í fyrra voru góðar og gáfu okkur ástæðu til að vera bjartsýnir,“ segir Binni sem kveðst sannfærður um að verði af loðnuvertíðinni. „Það var talsverður ís yfir svæðinu þannig að mælingin er ekki marktæk. Þannig að við erum bara bjartsýnir.“

Er hann með orðum sínum að vísa til þess að Hafrannsóknastofnun hafi sjálf greint frá því í tilkynningu sinni að hafís á norðanverðu rannsóknarsvæðinu hindraði að hluta áætlaða yfirferð. „Því gæti verið um að ræða vanmat á magni kynþroska stofnhlutans, en ekki er unnt að meta umfang þess,“ segir í tilkynningunni.

„Það verður vertíð. Við finnum hana (loðnuna) í janúar,“ segir Binni að lokum.