Morgunblaðið | 28.10.2020 | 10:05

190 milljarðar í greiðsluhléi

mbl.is/Eggert Jóhannesson

Lausafjárstaða stóru bankanna þriggja er sterk. Hinn 16. september áttu bankarnir lausar eignir umfram lágmarks lausafjárkröfur sem námu tæplega 255 milljörðum króna. Þetta er meðal þess sem kemur fram í fundargerð fjármálastöðugleikanefndar Seðlabanka Íslands í september. Staðan hafði lækkað um 15 milljarða frá fundi nefndarinnar í júní.

„Álagspróf á lausafjárstöðu bankanna benda til að þeir þoli mikið útflæði. Álag á erlendar skuldabréfaútgáfur bankanna hafði lækkað verulega milli funda. Er þetta í samræmi við alþjóðlega þróun. Álagið er nú heldur hærra en fyrir farsóttina.

Rúm lausafjárstaða í erlendum gjaldeyri hefur veitt bönkunum svigrúm til að takast á við krefjandi markaðsaðstæður erlendis án þess að þeir hafi þurft að ráðast í skuldabréfaútgáfur.

Vaxtaálag á sértryggðum bréfum bankanna umfram ríkisbréf hafði einnig lækkað áfram á milli funda og var svipað og fyrir útbreiðslu farsóttarinnar,“ segir í fundargerðinni sem var birt á vef Seðlabanka Íslands í gær.

Eiginfjárstaða bankanna sterk

Tap stóru bankanna þriggja á fyrri helmingi ársins nam 700 milljónum króna. Uppgjör bankanna voru lituð af aukinni virðisrýrnun og nam hún rúmlega 23 ma.kr. á árshelmingnum. „Viðbúið er að til frekari virðisrýrnunar komi á næstu ársfjórðungum dragist farsóttin á langinn.

Þrátt fyrir þetta er eiginfjárstaða bankanna mjög sterk og var eiginfjárhlutfall þeirra að meðaltali 24,8% í lok júní sl. samanborið við 22,4% í lok desember 2019.

Sterk eiginfjárstaða og aflétting sveiflujöfnunaraukans veitir bönkunum svigrúm til að takast á við aukið útlánatap og halda þrótti til nýrra útlána á sama tíma.

Um miðjan september sl. voru um 190 ma.kr. af útlánum stóru bankanna þriggja í greiðsluhléi vegna farsóttarinnar. Það voru rúmlega 6% af útlánum bankanna til viðskiptavina en hlutfallið hafði lækkað hratt vikurnar á undan, þar sem 6 mánaða greiðslufrestur var í mörgum tilvikum á enda runninn.

Greiðsluhlé voru algengari hjá fyrirtækjum eða tæplega 9% samanborið við rúmlega 3% af útlánum til heimila. Nær fjórðungur útlána til ferðaþjónustufyrirtækja var í greiðsluhléi, um 12% af lánum til þjónustu og um 10% lána til verslunar. Hlutfallið var lægra í öðrum atvinnugreinum. Vanskil höfðu aukist. Frá áramótum til loka júlí hafði hlutfall útlána bankanna til heimila í vanskilum hækkað úr 2,1% í 2,7% og hjá fyrirtækjum úr 4,8% í 8,9%,“ að því er segir í fundargerð nefndarinnar.