Morgunblaðið | 17.11.2020 | 16:50 | Uppfært 17:08

ÚR meðal aðalstyrktaraðila Sjávarklasans

Runólfur V. Guðmundsson, framkvæmdastjóri ÚR, og Berta Daníelsdóttir, framkvæmdastjóri Íslenska sjávarklasans, við undirritun samstarfssamnings. Ljósmynd/Aðsend

Útgerðarfélag Reykjavíkur hf. verður einn af aðalstyrktaraðilum Íslenska sjávarklasans en undirritaður hefur verið samningur um áframhaldandi samstarf, að því er fram kemur í fréttatilkynningu. Þar segir að samstarfssamningurinn sé liður í stefnumótun ÚR sem miðar að því að víkka starfsemi félagsins og vinna að nýsköpun í sjávarútvegi og annarri hafsækinni atvinnustarfsemi.

Þá mun ÚR styðja sérstaklega við frumkvöðla sem eru að stíga fyrstu skrefin við að þróa nýjungar í hafsækinni starfsemi.

Framtíðin byggist ekki á að auka landaðan afla

„Samstarf okkar við Sjávarklasann er liður í viðleitni félagsins til að vinna að nýsköpun í sjávarútvegi og nýta tækifærin í bláa hagkerfinu til að auka verðmæti sjávarfangs. […] Framtíðin í greininni byggist ekki á að auka þann takmarkaða afla sem að landi kemur, heldur auka verðmæti hans,“ segir Runólfur V. Guðmundsson, framkvæmdastjóri ÚR.

Íslenski sjávarklasinn er vettvangur fyrir samstarf frumkvöðla og fyrirtækja í sjávarútvegi og haftengdri starfsemi. Í Húsi sjávarklasans við Grandagarð er samfélag yfir 80 aðila sem vinna að fisksölu, sjávarútvegstækni, fiskeldi, líftækni og margvíslegri nýsköpun.

„Á næsta ári eru 10 ár frá stofnun Íslenska sjávarklasans. Það fjölbreytta starf sem fram hefur farið á vettvangi klasans hefði aldrei orðið jafn öflugt ef ekki hefði komið til stuðningur og áhugi öflugra samstarfsfyrirtækja á borð við Útgerðarfélag Reykjavíkur. Fram undan eru spennandi tímar hjá Sjávarklasanum þar sem lögð verður áhersla á að virkja nýsköpunarumhverfið til að skapa verðmæti fyrir íslenskan sjávarútveg, auka sjálfbærni og bæta allt umhverfi hafsins,“ segir Berta Daníelsdóttir, framkvæmdastjóri Íslenska sjávarklasans.