Morgunblaðið | 27.11.2020 | 21:08 | Uppfært 29.11.2020 10:21

Gæslan kölluð út vegna elds í flutningaskipi

Varðskipið Þór var kallað út vegna eldsins. mbl.is/Árni Sæberg

Eldur kom upp í flutningaskipi sem var á leið með laxeldisfóður frá Bretlandseyjum til Þingeyrar á áttunda tímanum í kvöld. Sjö manns voru um borð en skipið var miðja vegu milli Færeyja og Íslands þegar neyðarkall barst frá skipinu. Áhöfn þess náði að slökkva eldinn skömmu síðar.

Þetta kemur fram í tilkynningu frá Landhelgisgæslunni en varðskipin Þór og Brimill voru kölluð út vegna þessa.

„Björgunarþyrla frá Færeyjum var kölluð út en þurfti frá að hverfa. Varðskipið Þór sem statt var á Héraðsflóa var sent til móts við skipið sem og færeyska varðskipið Brimill. Bæði varðskipin eru um 160 sjómílur frá flutningaskipinu. Skipið er vélarvana eftir eldsvoðann. Gert er ráð fyrir að Brimill dragi skipið til Færeyja en Þór heldur stefnunni að skipinu til öryggis og ef á þarf að halda,“ segir í tilkynningunni.