„Maður hefur verið að glíma við þetta lengi“

Þingmenn meirihlutans í atvinnuveganefnd Alþingis sem Morgunblaðið hefur rætt við virðast nokkuð jákvæðir í garð frumvarps þingmannsins Páls Magnússonar sem hann segir til þess gert að skerpa á gildandi fyrirkomulagi um takmarkanir á eignarhaldi á aflaheimildum. Þetta á einnig við um þingmenn minnihlutans og því sterkar vísbendingar um að frumvarpið fái þinglega meðferð. Þingmennirnir allir taka vel í hugmyndirnar með fyrirvara.

Frumvarpið var birt á vef Alþingis síðdegis í gær og er þar lagt til að aðili sem þegar á aflahlutdeild festir kaup á hlut í útgerð með aflahlutdeild „skal leggja hlutfall kaupanda í aflahlutdeild seljanda saman við þær heimildir sem hann á fyrir. Telst sú heildaraflahlutdeild tilheyra kaupanda.“

Frétt af mbl.is

Vill girða fyrir meiri samþjöppun

Páll, sem er þingmaður Sjálfstæðisflokksins, sagði í Morgunblaðinu í gær að tilgangur frumvarpsins væri að sjá til þess að þakið fyrir aflahlutdeild staks aðila yrði virt, en þakið er 12% af útgefnum kvóta. „Mér finnst það bara vera gloppa að þú getir eignast 49% í félaginu án þess að nokkuð af aflaheimildum þess teljist til þinna. Að mínu mati á þetta bara að vera hlutfallslegt,“ sagði Páll.

Þarf að loka fyrir krókaleiðir

„Inntakið virðist hljóma skynsamlega en ég hef ekki kynnt mér þetta, en mér finnst þessi viðleitni jákvæð að koma fram með einhverjar hugmyndir í þessum málum,“ svarar Lilja Rafney Magnúsdóttir, þingmaður Vinstri grænna og formaður atvinnuveganefndar, er blaðamaður spyr um afstöðu hennar til frumvarps Páls.

„Maður hefur verið að glíma við þetta lengi og kannski mis mikill vilji hjá viðeigandi ráðherrum að taka á þessu,“ segir Lilja Rafney. Þegar rætt var við hana hafði hún ekki séð umrætt frumvarp og þótti því ekki við hæfi að taka afstöðu til þess.

Frétt af mbl.is

„Þetta er ákveðin atlaga að Kristjáni Þór Júlíussyni“

Almennt séð segir Lilja Rafney að „löggjafinn verður að leita allra leiða til þess að koma í veg fyrir frekari samþjöppun í sjávarútvegi og það verður að vera eitthvað raunverulegt þak en ekki bara einhver sýndarmennska.“ Þá sé mikilvægt að ákvæði laga um 12% þak sé skýrt og að komið verði í veg fyrir að hægt sé með krókaleiðum að komast hjá ákvæðinu. „Ég er mjög andsnúin þessari samþjöppun, bæði í litla kerfinu og stóra kerfinu, og tel að stjórnvöld verði að leita allra leiða til að koma í veg fyrir það,“ ítrekar Lilja Rafney.

Tekur undir sjónarmið Páls

Ásmundur Friðriksson, þingmaður Sjálfstæðisflokksins sem einnig á sæti í atvinnuveganefnd, kveðst taka undir þau sjónarmið sem Páll, flokksbróðir hans, lýsti í gær og segir mikilvægt að ræða þá þætti er snúa að tengdum aðilum og eignarhald í sjávarútvegi.

Hins vegar segir hann erfitt eð gefa upp afstöðu til frumvarps sem hefur ekki komið fyrir nefndina og einnig óljóst hvernig frumvarpið mun verða þegar það kemur úr nefndinni.

Ásmundur Friðriksson, þingmaður Sjálfstæðisflokksins. mbl.is/Eggert Jóhannesson

„Ég styð framlagningu frumvarpsins sem getur orðið til þess að bæta gagnsæi í sjávarútvegi,“ segir Ásmundur og bendir á að það eru fleiri þættir sem þarf að skoða í sambandi við aflahlutdeildir. Þá sé meðal annars hægt að auka gagnsæi og skilning almennings á kerfinu með því að hætta að ræða um þorskígildistonn og einfaldlega tala um hlutdeild í skilgreindum tegundum.