Morgunblaðið | 17.12.2020 | 17:52 | Uppfært 22:26

Leggja til að hefja sölumeðferð á Íslandsbanka

Íslandsbanki mbl.is/Hjörtur

Bankasýsla ríkisins lagði fram í dag tillögu til fjármála- og efnahagsráðherra um að hefja sölumeðferð á eignarhlutum ríkisins í Íslandsbanka hf. Lagði stofnunin einnig fram samhliða minnisblað til stuðnings tillögunni. Þetta kemur fram í frétt á vef bankasýslunnar sem birtist nú fyrir stundu.

Tillaga bankaskýrslunnar er svohljóðandi: Að selja eignarhluti í Íslandsbanka hf. þar sem stefnt verður að skráningu eignarhluta á skipulegan verðbréfamarkað innanlands í kjölfar almenns útboðs.

Í tillögu bankasýslunnar til ráðherra segir að tillagan sé lögð fram í samræmi við ákvæði i. og j. liðar 4. greinar laga nr. 88/2009 um Bankasýslu ríkisins. Er einnig vísað til 1. greinar laga nr. 155/2012 þar sem ráðherra er gert heimilt að selja eignarhluti ríkisins í Íslandsbanka hf. að fenginni fjárheimild í fjárlögum og að fenginni tillögu frá bankasýslu ríkisins.

Heimild fyrir sölunni fékkst í fjárlögum fyrir árið 2020, og er sambærilega heimild að finna í fyrirliggjandi frumvarpi til fjárlaga fyrir árið 2021. Eru því skilyrði laganna uppfyllt með tillögu bankasýslunnar.

Þróun á fjármálamörkuðum mun betri en vonir stóðu til

Í minnisblaði sem bankasýslan leggur fram með tillögunni er nánar farið út í rökstuðning fyrir henni. Er þar rakið að stofnunin hafi fyrst lagt fram tillögu hinn 4. mars síðastliðinn um að selja að lágmarki 20% hlut í Íslandsbanka hf. í samhliða söluferði, en að kórónuveirufaraldurinn og breytingar á efnahagsmálum vegna hans hafi stofnunin ákveðið að afturkalla þá tillögu 16. mars.

Segir í minnisblaðinu að frá afturköllun tillögunnar hafi þróun á fjármálamörkuðum og afkomu Íslandsbanka aftur á móti verið mun betri en vonir stóðu til um miðjan mars mánuð. „Frá 16. mars til 16. desember sl. hafa hlutabréf í íslenskum félögum (vísitala aðallista) hækkað um helming (50,0%) og hlutabréf í evrópskum bönkum (STOXX Euro 600 banka vísitalan) hækkað um tæpan þriðjung (32,4%),“ segir í minnisblaðinu.

Þá hafi farsæl hlutabréfaútboð með mikilli þátttöku almennings átt sér stað á tímabilinu og afkoma Íslandsbanka það sem af er ári verið betri heldur en álykta megi af sviðsmyndaspá Seðlabankans í júlí sl.

„Í ljósi þessarar þróunar telur Bankasýsla ríkisins rétt að leggja fram tillögu um sölumeðferð á þessari stundu og stefna að frumútboði hluta, en ekki beinni sölu til hliðar eins og tillaga stofnunarinnar frá 4. mars sl. hljóðaði,“ segir í minnisblaðinu.

Þá segir í minnisblaðinu að bankasýslan telji ekki rétt á þessari stundu að festa stærð þess eignarhluta sem bjóða eigi fram til sölu í útboðinu, þar sem áætluð eftirspurn fjárfesta muni ekki liggja fyrir fyrr en eftir fjárfestakynningar undir lok söluferlisins.

Þá verði einnig ljósara hver afkoma bankans sé, og segir í lok minnisblaðsins að verði þróunin neikvæð, þannig að hvorki fáist ásættanlegt söluverð fyrir eignarhlutina né arðgreiðsla, gæti Bankasýsla ríkisins lagt til við ráðherra að hverfa frá sölu og stofnunin í framhaldinu ráðast í viðeigandi breytingar hjá bankanum.

Tillaga bankasýslunnar til ráðherra.

Minnisblað bankasýslunnar til ráðherra.