Morgunblaðið | 18.12.2020 | 16:40

Sveitarstjórinn: „Þetta er náttúrulega bara áfall“

Neyðarstigi hefur verið lýst yfir á Seyðisfirði. mbl.is/Eggert Jóhannesson

Björn Ingimarsson, sveitastjóri Múlaþings, segir að aurskriðurnar á Seyðisfirði séu áfall. Hann veit ekki til þess að fólk hafi verið inni í húsunum sem urðu fyrir aurskriðu nú fyrir klukkan þrjú. Verið er að ferja fólk í rútum til Egilsstaða í fjöldahjálparstöð.

„Það komu tvær kröftugar skriður sem komu nokkuð utar en skriðurnar í gær og fyrradag,“ segir hann í samtali við K100.

„Þess vegna er bara verið að rýma staðinn í augnablikinu.“

Spurður að því hvort fólk hafi orðið fyrir skriðunni í dag segist Björn ekki hafa fengið um það upplýsingar. Viðbragðsaðilar kanna nú hvort einhver hafi verið inni í þeim húsum sem urðu fyrir skriðunni í dag, en þau er sögð nokkur talsins.

„Þetta er náttúrulega bara áfall,“ segir Björn um líðan bæjarbúa.