Hildur Þórisdóttir, fyrrverandi forseti bæjarstjórnar Seyðisfjarðar og sveitarstjórnarmaður Múlaþings, segir rýmingu bæjarins eftir náttúruhamfarirnar hafa gengið vonum framar og að íbúar hafi verið mjög samvinnuþýðir í aðgerðunum.
„Ég óttast að þetta sé ekki búið enn þá og að fleiri hús muni fara. Það er ljóst að það er gríðarlegt vatnsmagn sem hefur safnast upp í fjöllunum,“ segir Hildur í samtali við mbl.is. „Það mun taka fólk langan tíma að treysta fjöllunum aftur. Það er búið að kippa öllu sem heitir öryggi undan íbúum Seyðisfjarðar.“
Hún segir bæjarfólk hafa sýnt mikla samstöðu í kjölfar áfallanna sem dunið hafa yfir.
„Það er mikið hreinsunar- og uppbyggingarstarf framundan. En á sama tíma er alveg ótrúleg samheldni hjá fólki. Seyðisfjörður er samfélag sem samanstendur af íbúum sem elska að búa þar. Það er seigla í fólki fyrir, og ég vona að sú seigla komi fólki í gegnum þetta hræðilega áfall,“ segir Hildur.
Hildur segir það magnað að ekki hafi farið verr þegar litið er til atburðarásarinnar í heild.
„Það eru allir svo þakklátir fyrir að enginn hafi dáið. Í þessum hörmungum er það stóra kraftaverkið.“