Sprungur hafa komið í ljós í kringum skriðusár við Nautaklauf, þaðan sem stóra skriðan féll ofan í byggðina við Seyðisfjörð í gær. Af þeim sökum var ákveðið að rýmingarsvæði innan svokallaðrar A-línu hættumats skyldi vera lokað í dag.
Fram kemur í tilkynningu frá almannavarnadeild ríkislögreglustjóra og lögreglustjóranum á Austurlandi að svæðið hafi verið skoðað í dag með hjálp flygilda.
Veðurstofa Íslands muni fara yfir gögnin í kvöld og í fyrramálið, en tekið er fram að vatnsþrýstingur hafi farið minnkandi í jarðvegi.
„Aðgerðarstjórn og Samhæfingastöðin hafa nýtt daginn til að skipuleggja komandi hreinsun og björgunarstörf og setja upp áætlanir þegar óhætt verður að fara inná hættusvæðið,“ segir í tilkynningunni.
Neyðarstig almannavarna sé enn í gildi á Seyðisfirði eftir að aurskriður féllu á bæinn í gær og íbúar hafi ekki enn snúið aftur.