Vel gekk að rýma hjúkrunarheimilið Fossahlíð og heilsugæsluna á Seyðisfirði í kjölfar aurskriðu sem féll á bæinn í gær. Þetta segir Guðjón Hauksson, forstjóri Heilbrigðisstofnunnar Austurlands, í samtali við mbl.is.
Sex heimilismenn hjúkrunarheimilisins Fossahlíðar á Seyðisfirði voru fluttir á hjúkrunarheimilið Dyngjuna á Egilsstöðum og sex fengu inn á Umdæmissjúkrahúsinu á Neskaupsstað. Þá munu þrír heimilismenn dvelja í heimahúsum hjá aðstandendum.
Engar hindranir urðu á flutningi heimilismanna vegna aurskriðanna eða rigningarinnar, en Guðjón segist afar ánægður með þá sem aðstoðuðu við rýminguna, sem og starfsfólk heimilanna á Neskaupstað og Egilstöðum, en það hafi brugðist hratt og vel við þegar þurfti að rýma bæinn.